Keblinger
Sareh wae Kang,
Masia dheweke ngundang "dear"
Atiku ora bakalan keder
Apa maneh keblinger
Ngapa ngolek wong manca
Neng kene wae ana
Atiku ra bisa suwala Kang,
Arepa tumpakanmu sekuter
Wus bisa agawe atiku gemeter
Ora bakalan atiku gigrig
Ngapa kudu sujana
Asmamu wus tumancep jroning dhadha
Ayo Kang,
Pada tumandang
Angayuh urip padang
Donya akhirat kang diancas
Kita iki mung sa derma urdenas
Blitar 19042017
Lintang Panjer
Cahyane lintang ora kaya padatan
Lintang panjer tan ana kedhepe netra
Kadya ana sanepa kang kinandhut
Madhep,pancer setya tuhu
Angin wengi midit sumilir angluh
Kandeg panase cahyane sang kartika
Tansaya nunjem mawa dhawuh
Apa kang bakal lumaku esuk
Duh Gusti ingkang murbeng dumadi
Mendah punapa wadi kang kinandhut sanepan punika
Pitakon tan ana wangsulan
Tumancep ing petenge dalan
Blitar, 14 April 2017
No comments:
Post a Comment